偲嫣卿卿如晤：

都唔想文謅謅，用卿卿如晤會親切一啲。叫你偲嫣姐，又怕把你叫老了，叫你偲嫣妹，又怕你誤會搞男女關係。坦白講我又確實對身軀龐大啲人感到吃不消，太肥膩了，飲幾杯普洱先消到滯。我知寫這封信有啲冒昧唐突，反正大家面皮都唔薄，如果面皮薄就脂肪搭夠，我鼓起勇氣給你寫，給你打氣，支持你為正義犧牲脂肪，但千萬不要犧牲色相，後者會是浪費。浪費時間甚至生命，時有發生，浪費色相就萬萬不能，絕食時請盡量遮蓋脂肪，至少都若隱若現地遮住下，如果唔係，人哋一睇，就會心想：你咁有絕食條件，容乜易好似歡樂今宵咁，長做長有，等極你都命不該絕，人哋就無興趣睇落去，政府分分鐘拉你阻街，食環可以拉你非法露營，唔係道道都可以札營架，要喺designated area至得架。我都知你其實都好想真係畀人拉。拉你咪係畀個下台階你囉。為咗BMI，你要堅持多一陣呀，唔好搏拉呀。靜雞雞食少少嘢喇，唔好成日稔住會死喇，英年早逝，天妒英才，所以你唔會咁早去，千祈唔好假戲真做。

啱啱睇到你facebook，你好感人，你敢都講得出「偲嫣躺下了，也許不可以再起來」，我都唔知，原來你肥到起身都有困難，今次真係要堅持減磅。你都聽過「兩害而娶其輕」架啦，人哋娶老婆都揾個無咁大隻架，食量細啲，手腳靈活啲，香港地方咁細，張床又細，娶老婆都揾個細粒的架啦，起碼轉身易啲，無咁易跌落床喎。

老老實實，做乜要將減肥講成絕食啫？你話為公義絕食，人哋就喺你隔離食麥當奴，你話死唔死，特登引死你，不如算把喇，絕乜鬼食啫，詐帝暈咗咪收工囉，好唔好？今時今日，人人都講公義，人人都自稱為公義而戰，個個都攞上帝出嚟，上帝聽得邊個講喎？

點解絕食啲人要喺政府總部嗰度？係咪因為呢個大舞台唔收埸租，免費做show，所以咁旺？你其實有冇做市場調查架，邊有絕食得逞架？又無絕食死過人喎！厭食就會死人。不如餓到達標就收皮喇，點先達標？報紙又賣哂，啲friend 又like 哂，快啲收埋個帳幕落幕喇，唔係一陣馬恩國行過話你You are not even a Fxxking Chinese黑蚊蚊佢睇唔清楚，以為你係澳洲肥婆。林慧思行過又話What the Fxxk! 做乜警察唔執法拉你阻街。陳克勤行過，見到你呢個啖啖肉嘅自己友，同你打氣：Leticia,  try your breast， 陰公囉，都唔知try唔try好。如果有七十萬人投票，就try喇。我講咁多都係為你好咋！

你最新的粉絲

標笑上