上一篇講熟食小販, 使我想起了一個魚蛋粉的故事。 

 

讀中學時有同學住在長洲, 有一次招攬了幾個同學到他家中玩耍, 他帶了我們到碼頭旁邊吃魚蛋粉, 其實想我們見識一下魚蛋西施。當年是年青小伙子, 除非特別的豬扒, 否則女人都是美女, 見到那兩女子, 現已不記得是否沉魚落雁, 依稀是鄉村娥媚, 皮膚白裏透紅, 少年無醜婦。至於魚蛋粉是甚麼味道已記不清了。女兒年幼時帶過她們去長洲多次, 但沒有再幫襯過。倒是移民後有一年刻意造訪, 想追尋過去的食味, 可惜碰上東主有喜, 摸了門釘。碼頭旁邊的排檔已在多年前拆掉, 重建成比以前大的熟食市場, 而魚蛋西施的粉麵檔也遷了入鄰近的店鋪經營, 招牌依舊, 名叫張記。

 

我最近返港就刻意走去長洲逛逛, 雖然是閒日, 渡輪也爆滿。下船的第一感覺, 嘩! 仲多人過崇光門口, 真有點意外。在船上聽到四鄰話語, 已知同胞跟上帝一樣, 無處不在。船上的情景, 雖然在心理上已有所預期, 落船時見到碼頭的擠逼, 始終超出預期。魚貫而行經過張記, 排隊的人並不算太多, 於是慫踴老伴吃其西施魚蛋。招呼人客的阿姐十分麻利, 三扒兩撥就安排好座位。我少時已吃過香港仔謝記無數次, 正一由細食到大, 食到佢執埋。筲箕灣的安利在移民前也吃不少, 因為在東區居住及在西灣河上班。張記卻久違了。以前打魚蛋的狗棍已給人吃到絕了種, 張記用來打魚蛋的我相信是門鱔。味道不錯啊, 也比安利便宜。游目四顧, 那幾個阿姐無一個似西施喎! 心中嘀咕, 可能當年無知, 把女人都當西施。標少年紀大了, 求知慾仍然很強, 不恥下問是我的強項。可是, 斷不能直接了當問誰是西施。這樣問法不恥會變無恥。於是, 趁未埋單前, 剛巧人客較少的時候, 乘機問下那位做事麻利的阿姐。阿姐, 請問你她啲炸魚皮係乜魚嚟呀? 門鱔皮。一如所料, 是門鱔。我又再問。 阿姐, 我好多年無嚟幫襯, 你哋依家仲係唔係以前嗰代人打理生意呢? 唔係囉, 嗰啲女移咗民去加拿大, 佢哋仲係好靚, 依家由個仔打理, 佢哋嘅細佬。嘩! 阿姐真醒, 就係知道我想知嗰兩個西施嘅下落。最後, 我話我第二次飛返嚟再嚟幫襯。

 

唉! 咪一味講本土, 好食嘅嘢人哋大陸同胞咪都嚟撐你場囉, 喺安利同張記門口排隊嗰啲都唔少係大陸人, 有麝自然香。長洲嗰啲芒果糯米糍咪喺香港做到成行成市, 眼光闊啲就唔會開口埋口淨識講本土。