回應 : 0 | |||||||
收費代做小學功課 網站稱為學生減壓 【明報專訊】消除學生功課壓力也成為商機。本報發現10多個網頁及社交網站推銷代做功課,除了代做大學論文,甚至可代做中小學功課,聲稱「學校壓力的完美的解決方案」。本報記者上周三(20日)要求其中一個網站代做一篇80字的英文作文,網站負責人即日交貨,收費75元。教育局回應表示,聘請別人代做功課的行為應予杜絕。有教師批評代做功課「可恥」,勸學生不要「請槍」,免失去學習機會。 聲稱代筆者具碩士學歷 本報發現10多個網站、facebook及instagram帳戶推銷代做功課,有些是按時收費,每分鐘2.5元,亦有以字數計算等。當中一個網站聲稱是「全港最大代做功課網站」、「學校壓力的完美的解決方案」,已為超過100名學生提供服務。 本報上周以顧客身分聯絡該網站,20多歲、聲稱在美國大學畢業的負責人Lawrence回覆稱,該網數個月前成立,按時收費,每分鐘2.5元,代筆者具碩士學歷,但他最終沒有供學歷證明。記者以小六生的親友身分,要求他代做一篇80字的英文作文,他即日交貨,寫了79字的作文收費75元(見另稿)。 Lawrence稱,該網主要替大專學生做畢業習作,每篇需6至7小時(即900至1050元),亦可達9至10小時,另有中學及小學生要求代做功課,包括有小五生要求代作文,要到銀行入數付款。 稱提供功課只作參考 本報其後以記者身分向上述網站查詢,對方以WhatsApp回覆稱,代做功課無問題,「只是現在眾多服務中其中一種」,亦可為學生減壓,強調提供的功課只作參考,「至於學生有沒有自己更改內容及提交,並不能控制」。他說,很多家長和補習教師都會代做功課,該網站會在服務前加入條款,確保學生知悉功課只作參考用途。 另外,本報要求另一facebook專頁代寫社會科學系的2500字論文,獲回覆「無人手安排到」、「我地(哋)功課排到6月了」,以及該學科人手較少。 教師:代做可恥 失學習機會 資深通識科教師方景樂批評,賣功課網可恥,學生請槍問題性質非常嚴重,必須懲處。他提醒學生若請槍,「永世唔會透過呢個學習拎到個能力」,即使「呃埋DSE考試」,在職場最終也會吃虧。 教局:應杜絕 家校會:或因競爭文化 家校會主席湯修齊認為,代做功課未必與功課多有關,學生或因競爭文化追逐分數而找人代做。他說,家長須檢視自己對子女的關心會否變成壓力,造成反彈,認為家長與校方應教導,做功課屬學習過程。 教育局發言人回覆稱,聘請別人代做功課的行為應予杜絕。若學生面對學習困難或生活規律欠佳未能完成家課,或逃避做家課責任,學校和家長需要合力尋求方法予學生支援,助他們克服困難和分配時間完成功課,並予以鼓勵,提升學習自信。 (24/4/2016)
這是一則令人爆笑的新聞, 小學功課請槍請到商業化確是有生意頭腦, 香港乜都有, 千奇百怪。我讀過四間小學, 現在全部執晒笠, 我只記得其中三間的名字和位置, 第一間是不同年級同班上課的, 那是會困黑房的年代, 邊個孬就困入去一陣, 依家邊有人知啲咁嘢。
以前讀小學無乜功課做, 當然可能我記錯只係自己無乜做, 所以少年不知愁滋味, 今時今日的小朋友, 邊有快樂可言, 時常看着起跑線, 一出世就準備就緒, 開始比拼, 連發夢的空間也沒有, 了無生趣。
以前唔做唔交功課, 默書測驗唔合格, 就會罰抄及打手板。那是可以體罰的年代, 老豆老母會同先生講, 佢孬你幫我打下佢, 先生老實不客氣一於聽晒家長話。今時今日, 做老師鬧人啲仔女, 分分鐘畀人去學校摑幾巴, 打一兩鑊, 打人個仔監都有得你坐。我最鍾意打手板, 乾淨利落, 打完就乜都唔使做, 兩不相欠。先生打手板梗係唔會用自己隻手嚟打, 而係叫教木工的先生刨了一條好似雞髀型嘅木頭嚟打, 都好鬼痛, 不過標少硬頂, 不哼一聲, 痛到入心, 男兒有淚不輕彈, 打到隻手好似着咗火咁, 都未喊過又未求過情要打少幾下, 又唔會出貓以圖合格, 又唔會點讀書喎, 所以長打長有, 罰抄也長罰長有。同班老友講兒時往事, 有條友仲過瘾, 罰抄唔抄, 加倍一樣唔抄, 加多幾倍, 睬你都傻。見家長, 唔得閒, 終於掛住個牌在胸前, 寫住「大懶蟲」, 掛咗一日, 罰抄一筆勾消。條友仔EQ好到爆, 一個人成日走去流浪, 烽煙四起的地方去勻晒, 珠峯base camp都去過。做完癌症手術已計劃環遊世界。
明報另一篇新聞, 陸大狀話或涉「串謀詐騙」 「槍手」學生可被控, 我同老婆講咁就要拉晒你全家, indictable offence無time bar, 事關佢細佬讀小學時, 有一年到放完暑假前一晚先至講幾本暑期作業一頁都無做過, 於是兩老總動員幾個家姐一齊做, 做完可以每人一碗雲吞麵, 又串謀又同謀, 仲唔死。呢條友仔依家係大學教書, 有兩個PhD, 咪又係無做功課請槍手。 時代唔同晒, 依家一出世就競爭到死, 功課做到癲, 佢哋真係比上一代叻好多? 我還很嚮往快樂的童年, 乜都唔識, 淨係發白日夢, 日日做街童, 返學最鍾意就係上體育, 暑假就去做童工, 一早就識煮飯, 依家啲細路比我哋嗰陣幸福啲嗎? |
Copyright © Easy Property Co., Limited. All Rights Reserved.