出師表 in Cantonese 

睇得明，證明你廣東話有返咁上下！ 

<出師表>廣東話版本，超堅！  

我同你講：你伯爺撈世界撈到一半就拉佐柴。宜家個場又分成三忽，益州又就快俾人掠埋，家下真係幾大鑊。好彩你老豆班o靚夠姜，劈起友黎唔要命，你估佢地為你啊？！俾面你老豆咋！所以唔好話我話你丫，系識諗個就的起心肝搞好個社團佢，咪搞到你老豆死都唔眼閉呀。唔好成日以為自己成隻狗咁，班契弟個個都睇你頭架，唔好俾面唔要面！  

屋企同場口都係你地頭，邊個唔識做就打埋去，千祈唔好就住就住。下面班o靚見到就無晒嘢講啦。好似喪郭啊、費爺啊、老董啊佢地都係你死鬼老豆D手足，得閒就同佢地斟下，無壞既。向寵條契弟雖然霎下霎下，之但係佢又幾識撈，你死鬼老豆舊時都幾睇重佢嘎。有時間同佢飲下茶，有著數實會預埋你。知唔知點解先漢咁風生水起，就係因為班廢柴俾人斬晒！  

唔怕同你講，你世伯我原先系南陽耕田架咋，個勢立立亂，好彩就話執翻條命仔，諗都無諗過出黎行。難得你死鬼老豆唔嫌我縮骨，日日黎痴飯食，問哩問路，仲煩過伯爺婆，我頂佢唔順唯有出黎陪佢撈世界。後尾俾人踩場系我出去頂，俾大耳窿追數又係我出去頂，頂下頂下都成二十幾碌咯。  

你個死鬼老豆知我有料，死唔斷氣都要交晒D生意俾我。日又捱夜又捱，又驚死撈得唔好你老豆半夜翻黎搵我，咪系五月份帶班o靚過大海，果度真係毛都唔多條！宜家好啦，南邊個場俾我地擺平左，班契弟又搵晒架撐，你好去劈友啦。邊個唔順超既就斬開佢幾廿椂，掟落鹹水海餵鯊魚，將我地個啲場攞晒翻黎。嗱，你死鬼老豆就交帶我咁多嘞，其他你去搵我之前講果幾條友喇。  

世侄，我幫你劈埋今次友，撈唔掂你就捉我去祭旗。如果個場口唔夠旺，就去揾喪郭果幾條茂利同你拆。其餘既嘢，就睇你自己啦！ 

我就走架啦，寫呢篇嘢真係寫到成殼眼淚鼻涕，都唔知寫緊乜，你自己執生。  

引自: 人人粵韻  

<出師表>原文： 

臣亮言：先帝創業未半而中道崩殂，今天下三分，益州疲弊，此誠危急存亡之秋也。然侍衛之臣不懈於內，忠志之士忘身於外者，蓋追先帝之殊遇，欲報之於陛下也。誠宜開張聖聽，以光先帝遺德，恢弘志士之氣，不宜妄自菲薄，引喻失義，以塞忠諫之路也。宮中府中，俱為一體，陟罰臧否，不宜異同。若有作姦犯科及為忠善者，宜付有司論其刑賞，以昭陛下平明之理，不宜偏私，使內外異法也。侍中﹑侍郎郭攸之﹑費禕﹑董允等，此皆良實，志慮忠純，是以先帝簡拔以遺陛下。愚以為宮中之事，事無大小，悉以咨之，然後施行，必能裨補闕漏，有所廣益。將軍向寵，性行淑均，曉暢軍事，試用於昔日，先帝稱之曰能，是以眾議舉寵為督。愚以為營中之事，悉以咨之，必能使行陳和睦，優劣得所。親賢臣，遠小人，此先漢所以興隆也；親小人，遠賢臣，此後漢所以傾頹也。先帝在時，每與臣論此事，未嘗不歎息痛恨於桓﹑靈也。侍中﹑尚書﹑長史﹑參軍，此悉貞良死節之臣，願陛下親之信之，則漢室之隆，可計日而待也。臣本布衣，躬耕於南陽，苟全性命於亂世，不求聞達於諸侯。先帝不以臣卑鄙，猥自枉屈，三顧臣於草廬之中，諮臣以當世之事，由是感激，遂許先帝以驅馳。後值傾覆，受任於敗軍之際，奉命於危難之閒，爾來二十有一年矣。先帝知臣謹慎，故臨崩寄臣以大事也。受命以來，夙夜憂勤，恐託付不效，以傷先帝之明，故五月渡瀘，深入不毛。今南方已定，兵甲已足，當獎率三軍，北定中原，庶竭駑鈍，攘除姦凶，興復漢室，還于舊都。此臣所以報先帝，而忠陛下之職分也。至於斟酌損益，進盡忠言，則攸之﹑禕﹑允之任也。願陛下託臣以討賊興復之效；不效，則治臣之罪，以告先帝之靈。若無興德之言，則責攸之﹑禕﹑允等之咎，以彰其慢。陛下亦宜自謀，以諮諏善道，察納雅言，深追先帝遺詔。臣不勝受恩感激，今當遠離，臨表涕泣，不知所云。