|
特首選戰中，唐英年因大屋僭建被梁振英「踩住上」，但一場在流浮山舉行的黑金江湖飯局，將唐營的頹風稍為扭轉，為了爭選票，梁營人士不惜踩入唐營的票倉——新界鄉紳的地頭，甚至連江湖人士也吸引過來。黑金飯局曝光後，有份出席的梁營以及鄉事派人士，對幕後主腦的身份皆支吾以對，甚至互相推庄至不同的鄉事派代表，原因是這位重量級人物來頭殊不簡單。原來他就是在新界最有影響力的勝和太上皇——囝囝（張銓漢）。囝囝作風向來低調，其實野心勃勃，飯局正給他一個撈政治本錢的機會，他一聲令下，各路鄉紳也要俾面出席，在特首選舉這敏感時刻，囝囝的出現，令這場小圈子選舉再不是「抹黑」，而是「真黑」！
週一下午三時，一身黑色羽絨打扮的囝囝，在幾名門生陪同下，終於在元朗一酒樓現身。甫坐下，囝囝便不斷接聽電話，顯得非常煩躁，圍坐的一班兄弟全部臉容嚴肅，酒樓侍應見氣氛緊張，沒一人敢主動走近。
飯局幕後主腦
約下午五時，一名年約五十的西裝男人出現，囝囝立即上前迎接，二人刻意離席，躲到角落處一張細枱密斟，一談便是一個多小時，之後西裝友先行離去。囝囝與西裝友談話後，回到座位與兄弟商討，約晚上七時，囝囝先行與兩名門生離開酒樓，乘坐一部黑色七人車離開。據知，囝囝一向習慣每天到該酒樓茶聚，不過過去兩星期卻不見蹤影，一直躲藏，目的是為避傳媒耳目，直至週一現身，正是為了一個月前流浮山黑金飯局作進一步部署。這場江湖飯局，梁營與鄉事派人士均表示並非主動邀約對方，而是由一名中間人牽線。雙方其後對「中間人」身份各執一詞，連日來不斷傳出不同版本，先後出現上海仔（原名郭永鴻）、林偉強、鄧賀年是中間人說法，但其實真正中間人，就是這名勝和重量級猛人──囝囝。據知，當晚囝囝在飯局中坐在上海仔旁邊：「有人搵上海仔搭路見班鄉紳，上海仔於是搵同是勝和人囝囝幫手，上海仔知道只要囝囝一吹雞，元朗班鄉紳實要俾面出席。」一名勝和元朗古惑仔阿朗透露說。
上海仔靠攏富豪權貴
九十年代，上海仔靠翻版碟起家，全港有逾百檔口，後來更成為勝和歷來最年輕坐館。他喜歡穿中山裝，梳了一個冬菇頭，喜歡與社會名人富豪交往，曾經與黎小田在跑馬地開設Piano Club；前幾年上海仔為母親搞白事，便有不少名人富豪俾面出席，包括金牌經理人黃柏高。據知，上海仔最善於取悅富豪闊太，已故富商林百欣的二太太余寶珠便是其契媽之一，因此認識林建岳。好賭的上海仔常在澳門賭場打躉，其後認識了一名澳門「大家姐」，得以在澳門開賭廳，成為澳門皇家金堡酒店賭場內「匯浚」的幕後廳主，他成功游說余寶珠入股投資，但其手下於○七年挾數百萬元走佬，賭廳執笠，令余蒙受損失。賭場失意，上海仔唯有敗走大陸，與內地人埋堆，勝和古惑仔指他現時只是表面風光︰「表面上佢排場做到足，出入又保鏢又平治，但佢實則有幾多cash大家心照，佢仲欠緊澳門某賭廳三百萬賭債未找數，所以有人出錢利誘上海仔，叫佢幫手搞飯局，佢一定二話不說。」
安排飯局
幫手搭線搞飯局，一向是江湖人搵食伎倆。據悉，一直想替梁振英出頭的劉夢熊，經朋友郭應泉介紹下認識上海仔。於是劉託上海仔作媒，表示希望約會元朗一班舉足輕重的鄉紳見面，原意是為梁振英拉票。「照江湖規矩，做媒作介紹人，約會雙方食飯見面，會先從要求的主導者手上收取一定數額報酬，事成後如果在飯局中有進一步承諾項目，會再收取該項目收益的某一個百分比。」阿朗解釋說。阿朗說，上海仔一向靠攀附富豪權貴為生，近幾年都是靠這種「媒人」生意賺錢：「江湖上出晒名，上海仔有錢就使得郁，有人使錢叫佢約班元朗鄉下佬，但上海仔自己支雞吹唔響，於是就去搵囝囝幫手，囝囝近年係元朗呼風喚雨，做的都是大茶飯，好似上次佢幫個地產商做中間人，約咗班元朗鄉紳傾談一個市值幾億 的屋苑 發展計劃，囝囝就先收幾十萬介紹費，之後個屋苑項目完成，囝囝又從中收取呢個屋苑項目幾個巴仙（%）作賞金報酬。」
另有陰謀
不過，是次囝囝願意充當中間人安排飯局，卻並非單純為「錢」。江湖盛傳，囝囝與上海仔在飯局中各懷鬼胎。江湖傳聞有人在與梁營人士傾談間，把有關的電話對話，全部錄音，日後一旦梁振英當選，自然手握黑材料作把柄。同時間，江湖飯局被傳媒踢爆後，上海仔高調接受兩間報館訪問，高呼不認識梁振英，反而手頭上有唐英年的黑材料。他其後爆料，聲稱○二年十二月廿二日，在東京帝國酒店，經林建岳介紹下認識唐英年，當時唐有女相伴，更暗示有「下文」，揚言有須要時會逐單爆料。唐英年之後報警，聲稱人身安全受到有社團背景人士威脅。上週五，上海仔接受本刊電話訪問時怒氣沖沖說︰「而家有人報警，砌緊我恐嚇呀，差館搵我，我仲要面對差館問我話呀，真係有寃無路訴……」據消息，上海仔因飯局「被擺上枱」，曾經離港暫避風頭。而囝囝卻一如神秘人一樣，在飯局後「坐享其成」。勝和人說，囝囝向外「爆響口」，現時手握唐、梁黑料，無論最後邊個跑出，囝囝都有「嘢」揸手，到時囝囝的勢力便「升呢」，由操控黑社會三級跳到操控政圈。「囝囝有錢，在江湖有地位，有財有勢，佢最想進一步染指政治，目標是發叔（劉皇發）級數。」阿朗說。
勝和「燒十八友」
現年五十多歲的囝囝，留有鬍子，但一向行事神秘，甚少拍照。他是元朗唐人新村原居民，早年移民英國，在英國及荷蘭發圍。約十年前帶着大量現金回港，隨即認勝和元老「阿矮」做大佬，挾着黑幫勢力，一直在元朗一帶招兵買馬。「佢（囝囝）十年前返香港，即與同門十八個重量級人物結義，包括白頭仔（勝和上水皇帝）、白頭福、訴苦森（勝和前坐館）、山頂標等，個個都係江湖重量級猛人，後來被稱為『燒十八友』。」阿朗說。元朗傳統一直是14K天下，元朗教父戴權與14K元朗之虎四眼細關係密切，四眼細更曾高調參與元朗區的鄉委會選舉，該區不時發生多宗黑幫毆鬥流血事件。直至十年前，囝囝在元朗插旗，元朗頓時翻天覆地︰「佢（囝囝）用『銀彈政策』，不斷用錢買人，撬咗好多14K四眼細同四眼文嘅細佬過底勝和，又用一百幾十萬買咗另一元朗勝和猛人『高佬安』旗下嘅『阿拱』、『日本仔』、『子明』三名最狠最打得的猛將跟佢。」一方面用錢買人買地盤，另一方面囝囝又用「籠絡手段」與一直盤踞於元朗的14K話事人結盟。「佢同『牛屎』有偈傾，牛屎係英國14K揸弗人，在倫敦華人社區極有影響力，兩個人早就喺英國時認識。」
染指政治
一名熟悉鄉紳與黑幫關係千絲萬縷的元朗地區人士透露，「囝囝九十年代已經介入政治，曾經幫十八鄉鄉委會戴權助選，九八年鄉議局班人參加立法會新界西直選，囝囝有份做助選團，唔係企喺參選人後面叫口號嗰啲，係吹雞叫班?派傳單掛橫額、同埋操控旗下班靚投票嗰啲，佢只要應承做，可以喺一晚之內掛晒成個新界西同埋貼晒商鋪住宅嘅信箱，動員能力超強。成個勝和可以話學識最多，最識得點樣玩鄉委會同區議會選舉。如果話班鄉紳唔識黑幫分子，真係無人信，佢哋好多仲一齊搵食。」囝囝財雄勢大，財力全靠在區內放貴利及發展地產物業。據資料，他先後在元朗附近開設多間公司，包括萬朗管理有限公司、嘉興遠東發展有限公司及威旺置業有限公司，所有登記地址均在元朗﹔另擁有多個位於元朗市區的鋪位及物業，現時大部分出租。根據高等法院案件記錄，囝囝於○九及一一年，有兩宗因元朗收地買鋪的爭執案件。另外，他一直替各大地產商在新界元朗區收地起樓。近年新鴻基地產在元朗有多個樓盤發展項目，包括尚豪庭及元朗東低密度項目。囝囝生財有道，據知現時身家過億。「佢上年仲買咗架法拉利，老婆就揸平治，好富貴。」阿朗說囝囝財雄勢大，近年更擺明要染指政治。過去囝囝沾手政治的手腕，多是背後發功；不過兩個月前，他卻與友人成立了一個「城鄉居民共和協會」。據知，囝囝名義上只是會員，但實際由他吹雞。該會在一月於屯門青山灣一酒家舉行就職典禮，登記成為合法社團，成員除了囝囝張銓漢，還包括新田鄉鄉事委員會主席文志雙、錦田鄉鄉事委員會主席鄧賀年、廈村鄉鄉事委員會主席鄧勵東等人，前兩者已先後承認有份出席黑金流浮山飯局。 「個會 成立，話就話乜嘢城鄉文化交流，實質係點無人知。佢仲專登改名『共和』兩隻大字，令人誤以為同阿爺有關。」有份出席成立典禮的一名人士向記者透露，囝囝當日非常鬼祟︰「影大合照時囝囝一直話唔影，但主人家話要，佢勉為其難坐响側邊影相，仲要將個掛响心口嘅名牌收埋先影。」
勝和太上皇
江湖人指，囝囝為人性格火爆，加上因為「靠派錢」上位，勝和內部很多人對他不滿。「佢同勝和前坐館雙鷹青唔係太咬弦，有次二人同枱食飯，因為元朗收地啲嘢好唔妥，囝囝更擺明唔俾面，幸好在場班兄弟及時阻止。」雙鷹青於荃灣冒起，九十年代曾帶人入元朗插旗，與不少鄉紳關係良好。囝囝在元朗搞地產，因土地問題曾與雙鷹青互相晒馬，曾引起勝和同門內訌。以拳頭打江山的雙鷹青，一直不屑有人用錢上位，所以一直敵視對方。「不過近年班兄弟都覺得以前黑社會嗰套講打講殺搵唔到食，所以勝和人都覺得囝囝識玩手段玩政治，又賺到錢搵到食，可能係勝和的將來。」阿朗嘆氣說。勝和現時是香港最大黑幫，對外號稱幫眾達十萬，多年來實行「坐館」、「揸數」分權而治的「雙坐館」制，今屆新紮 坐館「 子騰」正是囝囝門生，亦由他一手捧出來。「子騰資歷咁淺，點可能做坐館？佢只係勝和元老『雞腳黑』徒孫，囝囝財雄勢大，佢用財力支持在幫中舉足輕重的雞腳黑，利用『黑哥』的影響力捧子騰出來。其實勝和人都知，囝囝正是『坐館』背後真正手握大權的『太上皇』。」今次江湖飯局，表面上由上海仔做媒，暗地裡囝囝則是幕後主腦，不少古惑仔嘲笑說︰「而家太上皇（囝囝）咁犀利，（特首選舉）邊個跑出都好，勝和都有把柄在手，到時真係可以號令天下。」
覬覦鄉委選票
一餐飯局，赴會的梁振英競選辦三重臣、八個鄉議局選委竟連日講大話，對飯局出現多個版本。「今次個飯局，應承嚟嘅人都知道係梁營嘅人嚟拉票，我都有份被邀請，但我講明係幫唐英年，所以無應承去，但元朗嗰啲就一定要去呢個俾面派對，勝和嘅地盤就喺元朗，如果班鄉紳唔俾面，驚第日會喺元朗俾人搞。」一名有選委資格、但沒有出席飯局的新界東鄉委會主席透露。據知，上海仔一早到場，由頭食到落尾，並非劉夢熊同羅范椒芬所講，飯局中途先出現。不單只食飯有黑幫在場，間房出面都有幾條?在睇水。真正中途出現的，其實是囝囝，他入座二十分鐘左右，好似主人家一樣說了一番話，叫大家俾面俾面梁營，之後就離開。本刊記者追問有份赴會的上水鄉委會主席侯志強，曾揚言「唔識寫個驚字」的他，一聽囝囝個名，即說：「我唔係好清楚囝囝講過乜喎，我都係早走嗰個，我無食到啲鮑參翅肚喎！我唔想講囝囝喇，不如唔好再講佢，我無嘢再補充……」截至本週二的版本，梁營和鄉事派都聲稱是錦田鄉委會主席鄧賀年約，但有鄉委對本刊說：「肯定唔只係阿年（鄧賀年）一個人約，曾樹和（屏山鄉委會主席）先係主力嗰個，但囝囝已經落令，要集體保住高佬和（曾樹和綽號），推晒落去鄧賀年度，唔可以爆響口俾外面知有曾樹和約飯局。除咗保住高佬和，仲要保住佢後面同左派千絲萬縷嘅關係。」難怪綽號狐狸的鄧賀年被傳媒查詢時，先否認後又承認是飯局聯絡人。
民建聯票倉吸引
另一沒有應約的鄉委亦告訴本刊：「今次飯局係高佬和做中間人。我都係接到佢電話，高佬和黑白兩道都相熟，同勝和啲人好啱傾，近年亦想喺政界搏上位，呢幾年一直群住元朗區議會主席、民建聯梁志祥。梁志祥又係新界社團聯會嘅會長，民建聯同新界社團聯會幾乎操控成個元朗區議會，梁志祥諗住今年參加新界西直選，可能會扯埋高佬和一齊玩。」據江湖人士透露，梁志祥對囝囝甚為敬重，且關係密切，而梁志祥亦能控制民建聯新界選委的意向；囝囝與梁營人士飯局，說穿了，目標除了是鄉議局廿八張選票，還有新界社團聯會的選票。梁志祥是新界社團聯會會長，至少手握五十二張票，包括港區人大如譚惠珠、曹宏威等，還有十六名區議員都身兼新界社團聯會，主要是民建聯成員如劉國勳、陳恆鑌、蘇西 智等。 另外六名立法會議員亦兼任新界社團聯會，如民建聯譚耀宗、劉江華、張學明等。透過囝囝可影響鄉議局和新界社團聯共八十張選票去向，難怪梁營要拉攏他。
抽水攝石王劉夢熊
在梁營扮演「打手」角色的劉夢熊，在財經界搏出位，自吹自擂的作風經常成為笑柄。劉夢熊與在八、九十年代活躍於股壇的郭應泉認識十多年，兩人的緣分由上市公司開始。九七年郭應泉任中華發展（1051）的主席，證監會指他增持股份後，未有向聯交所披露，罰款二萬元，並遭聯交所譴責。中華發展又面對債務問題，股價因此江河日下，公司陷入財困。當時出任京華山一任首席顧問的劉夢熊於是出面搭路，最終在○○年找到星光電訊主席黃金富做白武士，注資五千五百萬入主中華發展，郭應泉跟劉夢熊因而熟絡起來。自1051從郭應泉易手後，公司改名五次，公司一時開發軟件，一時又搞信用卡防盜，後來劉夢熊○二年加入1051做董事，公司又變身資源股。○六年，劉夢熊又再度做中間人，撮合與中聯石化主席許智明的合作大計。當年，1051以新股加現金，投資許智明私人投資非洲小國馬達加斯加的石油，還大吹大擂指油田蘊藏量達一百六十億桶，然而中央電視的「經濟半小時」質疑馬達加斯加的石油儲量，令投資計劃衰收尾，更因此與許智明鬧翻。劉夢熊入局1051做董事後，最搞鬼之作，是於○七年宣布有意以六百八十億收購電訊盈科資產，令公司股價大幅波動。不久，劉夢熊索性接替黃金富出任1051主席一職，並四出收購蒙古煤礦、印尼金礦等，但大多無功而回，○九年把1051轉手給友好趙渡。一個轉身劉夢熊出任佳訊控股主席，重施故技又投資山東黃金冶煉公司及貴州省礦場，現時他泊住黃坤做東方明珠石油副主席。從偷渡來港、工廠主管到進身財經界，劉夢熊經常將這段傳奇式的經歷掛在嘴邊，又吹噓戰績彪炳，曾稱分別於○一及○二年，搭路幫九龍倉賣港通（32）給重慶富豪張松橋，及替九倉賣殼股寶福（21）予趙渡。
捷徑攀入政界
事業得意，六十四歲的劉夢熊希望躋身政界提升社會地位。○六年他參加推選行政長官的八百人選舉委員會，循資訊科技界出選，落敗收場。劉夢熊去年捲土重來，今次他「走精面」加入孔教學院，毋須競選便成為宗教界選委。劉夢熊○八年獲選為全國政協，此銜頭令他游走政圈更容易。他在《東方日報》及《文匯報》也有專欄論政。他稱文章獲得前政協常委徐四民欣賞。並得到徐老提攜，使劉夢熊能約董建華夫婦食飯。劉夢熊也加入徐四民創辦的《鏡報》月刊任董事，徐四民長子徐世英為《鏡報》月刊董事長。劉夢熊深諳傳媒有助建立形象，不時刊登全版廣告爭取注視，出位之作包括：聲討鄭經翰阻撓領匯上市、支持政改方案、要求引渡犯貪污罪的上海首富周正毅回港受審。其中刊登全版廣告支持港大醫學院改名為李嘉誠醫學院，他聲稱令李嘉誠為之感激，於是他並打蛇隨棍上邀請李嘉誠入股。一○年結石寶寶之父趙連海被以尋釁滋事的罪名判刑兩年半，劉夢熊發起港區全國人大代表二十九人聯署簽名聲援，獲《亞洲週刊》捧做封面稱「劉夢熊現象」。
梁營丑角搞亂檔
劉夢熊去年九月表態支持梁振英，但梁營競選辦主席張震遠表示，據他了解，梁振英跟劉夢熊並不稔熟，「佢好熱情，佢支持CY，但你話係咪好熟，我覺得應該唔係。」黑金飯局令梁營要與劉夢熊楚河漢界，但自梁振英宣布參選以來，劉夢熊一直為梁營擔任打手的角色。劉夢熊搭上梁振英源於梁振英團隊中欠財經人脈，除了科大商學院院長鄭國漢擔任競選辦顧問，及施羅德投資管理副董事長雷賢達為他站台外，欠缺較重量級的人物。因此，來自財經界的劉夢熊成功在梁振英身邊攝位上。作為梁營競選辦主席的張震遠因身處英國，未有出席江湖飯局，他對本刊說：「地點時間都係人哋安排，我哋淨係去呢個地方，幾多人、邊個人我哋都唔知，你可以話我哋太天真，但而家選舉期間，有選委話新界人士想溝通吓，我哋雖然知道呢啲人唔支持梁振英，但人哋叫到同你溝通你無理由唔溝通！」對於這位熱情的「梁粉」，張震遠也嚇一跳，「我睇電視時見到劉夢熊，點解佢喺嗰度？我都吃一驚。我聽過佢解釋，佢喺九龍有約會，有時間去睇睇。」劉夢熊現時已成為梁營的負資產，相信會被用完即棄！
|
