想測試您自己洞察問題的能力嗎? (2)

測試一已經完滿結束，現在要進行測試二。另一個辯論環節亦源自《領導人低頭拉車有時無可非議》，測試二將就這個環節的回應開展，詳情如下：

回應１：自薦2009-02-10 20:12:35

想知道多年來怡居有幾多間分行，是否越開越多，越做越大，有甚麼戰績，請王先生道來。

回應2：睇唔過眼既人2009-02-12 01:24:45

嘩好心王文彥有d自知之明喇.... 條友靜係識怪d員工質素差, "無可用之將，復無可用之兵", 但又唔反省下佢依個所謂高明統帥有幾不知所謂, 喂又唔見施永青黃建業佢地呻冇人才可用?中原美聯係佢地兩個帶領下越做越好越做越大, 相反怡居係擁有行內絕世武功既高明統帥英明領導下越做越細(沙田怡居由以前有幾間分鋪縮到依家得番銀禧一間!!) 如果真係好似王文彥所講"香港僱員的素質江河日下","無可用之將，復無可用之兵",咁照道理施永青黃建業都應該會遇到依個問題喇, 咁點解人地會做得咁好呀?係佢地有用人之明定係王文彥用人不明呀?係佢地足智多謀定係王文彥庸碌無能呀? 邊個至係高明統帥, 咩野至係高明統帥戰績已經講明一切!! 仲有如果唔係多得施永青, 中原點會有今日?如果王文彥仲係中原阻住地球轉, 中原只會係第二個怡居, "開100間分行都不成問題", 哂氣喇!王文彥最叻咪就係做大淡友, 旺市既時候吹淡風話有危機, 到跌市既時候就走出黎耀武揚威話自己睇市幾咁準! 喂經濟既野有高有低, 佢一味吹淡一定中架!唔通大旺市既時候我地又話佢講得唔岩呀! 佢會開100間分行, 怡居唔結業已經偷笑喇!!!

回應3：細心人2009-02-14 12:04:59

上面嗰兩位睇唔過眼嘅人同埋自薦，睇嘢似乎表面啲：

1.  施永青、黃建業佢哋內心好可能亦呻冇人才用，祇不過佢哋唔敢學王文彥我手寫我心唧。施永青時時閙手下一啲高層無料到，但死好命上咗位，呢啲其實就係呻冇人才用。

2.  施永青、黃建業冇人才用嘅問題，的確無王文彥咁嚴重，因為中原、美聯大行嘅效應，比較能滙聚人才，依家啲Sales，急功近利，成日諗住樹大好遮蔭，係人都去中原、美聯嗰啲大行啦，所以唔可以簡單咁認為施永青、黃建業叻，王文彥唔叻。

3.  美聯喺1973年創業，中原喺1978年創業，王文彥喺2000年先至接過怡居嚟做，嗰時中美已經係數一數二各有二、三百間分行嘅大行，大家起點唔同，中原美聯喺施永青、黃建業帶領下越做越大有乜出奇，佢哋隨便增加10%分行都成二、三十間啦。自薦你哋兩個人試吓依家開始做地產發展吖，睇下十年後，你哋搞嘅公司叻，定係李澤鉅依家帶領嘅長實威。

4.  咩嘢時候收縮，咩嘢時候擴充，係大學問。當形勢唔好，收縮嚟保持實力係聰明，死咁撐住唔縮，甚至亂咁擴充，係死蠢。由於大家都唔清楚點解沙田怡居果陣要收縮，我哋呢啲局外人唯有諗王文彥必有佢嘅苦衷，佢依家想請見習分行經理咪係想擴充囉。過去一年，中美嘅分行，都由280至300間收縮到200至220間，佢哋收縮得仲勁，自薦兩個人點解唔鬧吓施永青、黃建業呢？

5.  中原開頭嘅14年主要係由王文彥帶領（呢點係施永青講嘅），喺佢帶領下，中原喺87年已經超越咗美聯成為淋巴溫，中原今日嘅江山係佢打番嚟嘅，佢係中原嘅開國皇帝，單係呢樣，佢已証明咗佢嘅高明。

6.  王文彥離開中原嗰時，中原當時係最強嘅霸主。施永青利用咗呢個基礎嚟做大做好中原，唔可以証明佢高明過王文彥。想知王、施、黃邊過更高明，最好要佢哋喺相同嘅條件下創業，睇邊個先突圍而出。

7.  中細行有好多局限，單係唔容易請到好啲嘅人才就攞佢哋命，因為唔夠大行爭。怡居仲未做到越開越多，越做越大，呢啲都係中細行常見嘅問題。張錦成夠強啦，咪又係玩咗三、四年就香咗。講晒，中細行都係喺唔平等唔公平嘅條件下同中美競爭，佢哋要追上嚟，認真唔容易。

8.  自薦同埋睇唔過眼嘅人睇嚟似大行嘅Sales，我想提醒你哋，踩中細行嚟抬高大行未必對你哋有利，依家大行猛咁裁員減佣，如果啲中細行都冧晒，有朝一日大行炒你哋，你哋仲有邊度可以投靠呀。萬一你兩個喺中原人，就仲滑稽，踩中原開國皇帝咪就係踩中原，你兩個都無面喎。

回應4：自薦2009-02-15 01:15:52

咁長安地產又點?開波個陣，中原都唔見得好大wor。

根據細心人的邏輯，如果怡居跑出，就證明王文彥英明，如果脫腳，就係起跑點唔同，唔可以比較。

回應5：細心人2009-02-27 10:51:22

回應自薦

對唔住，咁遲至覆，無辦法，搵食艱難，有大deal扯，牙較戰要放埋一邊。

王文彥喺92年頭創立長安地產時，祇有中環寫字樓總行一間，而中原當時已有二十零間分行，長安同中原規模比較仲係蚊脾牛脾。要比較，唔止要比較量，仲要比較質，王文彥曾經提過：『到1992年初我離開中原時，中原這個地產代理界冠軍無論在公司規模和業績方面，都遠在亞軍美聯之上(約為它的1.5倍)，論公司聲譽之卓著，架構及規章制度之完備，人才之鼎盛(中原現時的最高層當權派及當時的，幾乎是同一班底)及營銷部隊之精銳，中原當時都一時無兩，我離開時亦沒有帶走一兵一卒，整間公司完整無缺。施先生是在這個基礎上開展他對中原的管治的。』。王文彥呢個中原開國皇帝將中原做得太大太強，使到『不帶一兵一卒』就離開中原開設長安嘅佢，一開波就面對一隻自己湊大嘅攔路虎。開波兵微將寡，要趕過中原、美聯呢兩間行內數一數二同埋有長久歷史嘅公司，難度確係好高，仲未成功，唔可以就咁譴責佢渣波。

要判斷一間公司嘅統帥高唔高明，既要睇結果，睇佢帶領間公司做成點，係成功定失敗，又要睇過程，睇吓佢打江山過程中表現咗啲乜嘢聰明才智、雄才大略。無錯，王文彥直至夷加仲未能成功帶領長安或者怡居超越中原、美聯，呢個証明佢仲未能創造第二次奇蹟，但唔好忘記，佢已經喺78年至92年創造咗第一個大奇蹟，就係帶領中原從無到有，從小到大，從弱到強，成為行內嘅龍頭大哥。佢曾經牙刷刷咁講：『我離開中原時的92年初，中原無論是規模還是業績，均為美聯的1.5倍左右。盡管中原現時規模(以分行數目及員工人數計)較92年初大許多，但美聯期間進步更速，規模至今與中原叮噹馬頭，上述多項成績且有過之(特別是盈利，可視為公司的綜合國力，此項勝幾乎可視為整體勝)。從量來說，在施先生領導下，中原這些年來有長足進步，但在質來看，中原其實是（較92年初）倒退了。』。不過你又唔怪得佢咁牙刷喎，喺帶領中原打江山果14年，佢既成功過（而且係大成功），又喺打江山嘅過程中顯示咗高明統帥應有嘅聰明才智、雄才偉略。

歷史上，唔係每一個高明統帥可以由頭到尾都成功。拿破崙最尾都係兵敗滑鉄盧，仲俾英國佬放逐同困死喺孤島，但無人可以否認佢係人類史上最高明嘅統帥之一。毛澤東喺大躍進同文化大革命衰修尾，但無人可以否認佢係一個少見嘅高明統帥，佢嘅軍事才能已經喺佢帶領中共奪咗國民黨江山嘅戰爭中表露晒。佢嘅軍事理論，西方軍事家夷加仲寫個服字。同樣道理，淨係開創中原同埋帶領中原成為行內第一大行呢件大事，大家已經唔可以否認王文彥係一個高明統帥，佢喺香港地產代理史上會係不朽人物之一。

所有想否定王文彥喺地產代理界成就嘅人，唔該你哋先舉出有邊幾個喺地產代理界成就大過佢！

回應6：何必苦　2009-02-27 16:06:09

回應細心人 

我相信沒有人可以否定王文彥在78-92年期間14年的成就，他的成就，的而且確證明他是一位高明的統帥。

不過，正如勁歌金曲的情況一樣，大家是聚焦在今季或上一年的十大歌手，十多年前的十大歌手，又有誰人在意？

一方面我們要承認事件實在論，但另一方面，我們亦必需向前看，畢竟，現在是十七年後的2009，如果我們仍然沉溺在蔡楓華的回億中，往後的路更加難走。

蒙牛的故事告訴我們，當年牛根生被迫離開伊利，一樣可以創立更強大的蒙牛。

我給大家的問題如下：

1.      何必苦的看法有無失當之處？

2.          如有，失當之處在哪些地方？

有興趣參加這個測試的朋友，請在七天內來信到我的電子郵箱，我會選擇較有代表性的文章發表，以饗其他讀者。最後，我會發表自己的補充意見。

E-mail : dennywongmy@yahoo.com.hk